14, April 2023
ਗੁਰੂ ਜੀ ਨੇ ਧਰਤੀ ਅਨੰਦਪੁਰੀ ਤੇ
ਅੱਸੀ ਹਜ਼ਾਰ ਦਾ ਇਕੱਠ ਬੁਲਾਇਆ
ਕੋਈ ਦੇਵੋ ਸੀਸ ਤਲਵਾਰ ਸਾਡੀ ਮੰਗਦੀ
ਮੁੱਖੋਂ ਫਰਮਾਇਆ
ਦਇਆ ਰਾਮ ਉਠਿਆ ਭਰੇ ਇਕੱਠ ਚੋ
ਸੀਸ ਹਾਜ਼ਰ ਹੈ ਸਿਰ ਝੁਕਾਇਆ
ਗੁਰੂ ਜੀ ਲੈ ਗਏ ਝੱਟ ਤੰਬੂ ਵਿੱਚ
ਨਾਂ ਦੇਰ ਸੀ ਲਾਇਆ
ਲਹੂ ਭਿੱਜੀ ਤਲਵਾਰ ਨੂੰ ਝੱਟ
ਤੰਬੂ ਚੋਂ ਲੈ ਕੇ ਬਾਹਰ ਸੀ ਆਏ
ਇੱਕ ਸੀਸ ਹੋਰ ਤਲਵਾਰ ਮੰਗਦੀ
ਉਠੋ ਜੋ ਦੇਰ ਨਾਂ ਲਾਏ
ਏਦਾਂ ਪੰਜ ਸਿਰਾਂ ਦੀ ਮੰਗ ਕਰਕੇ
ਪੰਜ ਹੋ ਗਏ ਪੂਰੇ
ਨਿੱਤਰੇ ਭਰੇ ਇਕੱਠ ਚੋਂ
ਇਹ ਪੰਜ ਜਾਣੇ ਸੂਰੇ
ਸਰਬ ਲੋਹੇ ਦਾ ਬਾਟਾ ਲਿਆਕੇ
ਖੰਡਾਂ ਵਿੱਚ ਸੀ ਧਰਿਆ
ਪਾਣੀ ’ਚ ਪਤਾਸੇ ਪਾਕੇ
ਪੰਜ ਬਾਣੀਆਂ ਨੂੰ ਪੜਿਆ
ਹੋ ਗਈ ਖੰਡੇ ਦੀ ਪਹੁਲ ਤਿਆਰ ਸੀ
ਅੰਮ੍ਰਿਤ ਪੰਜਾਂ ਨੂੰ ਛਕਾਇਆ
ਹੁਣ ਤੁਸੀ ਮੈਨੂੰ ਵੀ ਛਕਾ ਦਿੳ
ਗੁਰੂ ਜੀ ਮੁੱਖੋ ਫਰਮਾਇਆ
ਇੰਜ ਖਾਲਸਾ ਪੰਥ ਸੀ ਕਲਗੀਆ
ਵਾਲੇ ਸਜਾਇਆ
ਸਾਬਤ ਸੂਰਤ ਪੰਜੇ ਕੱਕੇ ਧਾਰਕੇ
ਬੂਟਾ ਸਿੱਖੀ ਦਾ ਲਾਇਆ
ਸਿੱਖੀ ਦਾ ਬੂਟਾ ਵਧਿਆ ਸਾਰੇ ਜਗਤ ਵਿੱਚ
ਗੁਰੂ ਗੋਬਿੰਦ ਸਿੰਘ ਜੀ ਦਾ ਲਾਇਆ
ਮਨਾਈਏਂ ਖੁਸ਼ੀਆਂ ਨਾਲ ਸਾਰੇ
ਖਾਲਸਾ ਦਿਵਸ ਅੱਜ ਆਇਆ
ਗੁਰਚਰਨ ਸਿੰਘ ਧੰਜੂ