18, February 2023
ਰਾਤੀਂ ਤੱਕੀਏ ਜੇ ਰੱਬ ਦੇ ਪਿਆਰਿਆਂ ਦੇ ਵੱਲ।
ਰਹਿਣ ਸੁਰਤ ਟਿਕਾਈ ਚੰਨ, ਤਾਰਿਆਂ ਦੇ ਵੱਲ।
ਰਜ਼ਾ ਰੱਬ ਦੀ ਜੋ ਰਹਿੰਦੇ ਭਾਵੇਂ ਦੁੱਖ ਘਣੇ ਸਹਿੰਦੇ,
ਕਦੇ ਝਾਕਦੇ ਨਹੀਂ ਉੱਚਿਆਂ ਚੁਬਾਰਿਆਂ ਦੇ ਵੱਲ।
ਸੁਖੀ ਰਹਿਣ ਓਹੀ ਬੰਦੇ ਤਨੋਂ ਹੋਣ ਭਾਵੇਂ ਨੰਗੇ,
ਨਾ ਜੋ ਤੱਕਦੇ ਬੇਗਾਨਿਆਂ ਸਹਾਰਿਆਂ ਦੇ ਵੱਲ।
ਚੋਣਾਂ ਵੇਲੇ ਨੇਤਾ ਸਾਰੇ, ਲੋਕਾਂ ਤਾਈਂ ਲਾਉਂਦੇ ਲਾਰੇ,
ਅੱਖ ਰੱਖਦੇ ਨੇ ਸੱਤਾ ਗਲਹਾਰਿਆਂ ਦੇ ਵੱਲ।
ਪੰਜਾਬੀਆਂ ਦੇ ਭੰਗੜੇ ‘ਚ ਢੋਲ ਦੇ ਡੱਗੇ ਦੇ ਉੱਤੇ,
ਜੱਗ ਦੇਖਦਾ ਏ ਬਾਹਾਂ ਦੇ ਉਲਾਰਿਆਂ ਦੇ ਵੱਲ।
ਸੁਘੜ ਸਿਆਣਿਆਂ ਦੀ ਪੈੜ ਨੱਪ ‘ਲਾਂਬੜਾ’ ਤੂੰ,
ਧਰੀਂ ਪੈਰ ਸਦਾ ਉਨ੍ਹਾਂ ਦੇ ਇਸ਼ਾਰਿਆਂ ਦੇ ਵੱਲ।