ਨਵੀਂ ਦਿੱਲੀ, 28 ਜੂਨ 2024 : 18ਵੀਂ ਲੋਕ ਸਭਾ ਦੇ ਪਹਿਲੇ ਸੰਸਦ ਸੈਸ਼ਨ ਦੌਰਾਨ ਕਾਂਗਰਸ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਨੇ ਲੋਕ ਸਭਾ ਸਪੀਕਰ ਓਮ ਬਿਰਲਾ 'ਤੇ ਨਿਸ਼ਾਨਾ ਸਾਧਿਆ ਹੈ। ਉਨ੍ਹਾਂ ਕਿਹਾ ਕਿ ਸੱਤਾਧਾਰੀ ਪਾਰਟੀ ਦੇ ਮੈਂਬਰਾਂ ਨੂੰ ਗੈਰ-ਸੰਸਦੀ ਅਤੇ ਗੈਰ-ਸੰਵਿਧਾਨਕ ਨਾਅਰੇ ਲਗਾਉਣ ਤੋਂ ਨਹੀਂ ਰੋਕਿਆ ਗਿਆ। ਦਰਅਸਲ, ਨਵੇਂ ਚੁਣੇ ਗਏ ਸੰਸਦ ਮੈਂਬਰਾਂ ਦੇ ਸਹੁੰ ਚੁੱਕ ਸਮਾਗਮ ਦੌਰਾਨ ਵਿਰੋਧੀ ਧਿਰ ਦੇ ਜ਼ਿਆਦਾਤਰ ਸੰਸਦ ਮੈਂਬਰਾਂ ਨੇ 'ਜੈ ਸੰਵਿਧਾਨ' ਦੇ ਨਾਅਰੇ ਲਗਾਏ, ਉਨ੍ਹਾਂ ਦੇ ਨਾਲ ਹੀ ਕਾਂਗਰਸ ਦੇ ਸੀਨੀਅਰ ਨੇਤਾ ਸ਼ਸ਼ੀ ਥਰੂਰ ਨੇ ਵੀ ਸਹੁੰ ਚੁੱਕਣ ਤੋਂ ਬਾਅਦ 'ਜੈ ਸੰਵਿਧਾਨ' ਕਿਹਾ, ਇਸ 'ਤੇ ਕਾਂਗਰਸੀ ਸੰਸਦ ਮੈਂਬਰ ਦੀਪੇਂਦਰ ਹੁੱਡਾ ਨੇ ਸ਼ਸ਼ੀ ਥਰੂਰ ਦਾ ਸਮਰਥਨ ਕੀਤਾ ਅਤੇ ਸਦਨ 'ਚ ਖੜ੍ਹੇ ਹੋ ਕੇ ਕਿਹਾ ਕਿ ਇਸ 'ਤੇ ਕਿਸੇ ਨੂੰ ਕੋਈ ਇਤਰਾਜ਼ ਨਹੀਂ ਹੋਣਾ ਚਾਹੀਦਾ, ਪਰ ਸਪੀਕਰ ਓਮ ਬਿਰਲਾ ਗੁੱਸੇ 'ਚ ਆ ਗਏ। ਇਸ ਤੋਂ ਬਾਅਦ ਹੁਣ ਪ੍ਰਿਯੰਕਾ ਗਾਂਧੀ ਵਾਡਰਾ ਨੇ ਓਮ ਬਿਰਲਾ 'ਤੇ ਹਮਲਾ ਬੋਲਿਆ ਹੈ, ਕਾਂਗਰਸ ਨੇਤਾ ਪ੍ਰਿਯੰਕਾ ਗਾਂਧੀ ਵਾਡਰਾ ਨੇ ਸਵਾਲ ਉਠਾਉਂਦੇ ਹੋਏ ਕਿਹਾ ਕਿ ਕੀ ਸੰਸਦ 'ਚ 'ਜੈ ਸੰਵਿਧਾਨ' ਨਹੀਂ ਕਿਹਾ ਜਾ ਸਕਦਾ। ਟਵਿੱਟਰ 'ਤੇ ਸੋਸ਼ਲ ਮੀਡੀਆ ਪੋਸਟ 'ਚ ਉਨ੍ਹਾਂ ਲਿਖਿਆ, 'ਕੀ ਭਾਰਤੀ ਸੰਸਦ 'ਚ 'ਜੈ ਸੰਵਿਧਾਨ' ਦਾ ਨਾਅਰਾ ਨਹੀਂ ਲਗਾਇਆ ਜਾ ਸਕਦਾ? ਸੱਤਾ 'ਚ ਬੈਠੇ ਲੋਕਾਂ ਨੂੰ ਸੰਸਦ 'ਚ ਗੈਰ-ਸੰਸਦੀ ਅਤੇ ਗੈਰ-ਸੰਵਿਧਾਨਕ ਨਾਅਰੇ ਲਾਉਣ ਤੋਂ ਨਹੀਂ ਰੋਕਿਆ ਗਿਆ, ਪਰ ਜਦੋਂ ਵਿਰੋਧੀ ਧਿਰ ਦੇ ਇਕ ਸੰਸਦ ਮੈਂਬਰ ਨੇ 'ਜੈ ਸੰਵਿਧਾਨ' ਦਾ ਨਾਅਰਾ ਲਗਾਇਆ। ਚੋਣਾਂ ਦੌਰਾਨ ਉਭਰੀ ਸੰਵਿਧਾਨ ਵਿਰੋਧੀ ਭਾਵਨਾ ਹੁਣ ਨਵਾਂ ਰੂਪ ਧਾਰਨ ਕਰ ਚੁੱਕੀ ਹੈ, ਜੋ ਸਾਡੇ ਸੰਵਿਧਾਨ ਨੂੰ ਕਮਜ਼ੋਰ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਅੱਗੇ ਲਿਖਿਆ, 'ਜਿਸ ਸੰਵਿਧਾਨ ਨਾਲ ਸੰਸਦ ਚਲਦੀ ਹੈ, ਜਿਸ ਸੰਵਿਧਾਨ ਨਾਲ ਹਰ ਮੈਂਬਰ ਸਹੁੰ ਚੁੱਕਦਾ ਹੈ, ਜਿਸ ਸੰਵਿਧਾਨ ਨਾਲ ਹਰ ਨਾਗਰਿਕ ਨੂੰ ਜੀਵਨ ਅਤੇ ਰੋਜ਼ੀ-ਰੋਟੀ ਦੀ ਸੁਰੱਖਿਆ ਮਿਲਦੀ ਹੈ, ਕੀ ਉਹੀ ਸੰਵਿਧਾਨ ਹੁਣ ਵਿਰੋਧੀ ਧਿਰ ਦੀ ਆਵਾਜ਼ ਨੂੰ ਦਬਾਉਣ ਲਈ ਵਰਤਿਆ ਜਾ ਸਕਦਾ ਹੈ? ਕੀ ਇਸਦਾ ਵਿਰੋਧ ਹੋਵੇਗਾ?'
