ਅਲਾਸਕਾ, 28 ਅਪ੍ਰੈਲ : ਸਿਖਲਾਈ ਤੋਂ ਪਰਤ ਰਹੇ ਦੋ ਅਮਰੀਕੀ ਫ਼ੌਜੀ ਹੈਲੀਕਾਪਟਰ ਵੀਰਵਾਰ ਨੂੰ ਅਲਾਸਕਾ ਵਿੱਚ ਹਾਦਸਾਗ੍ਰਸਤ ਹੋ ਗਏ, ਜਿਸ ਵਿੱਚ ਤਿੰਨ ਪਾਇਲਟਾਂ ਦੀ ਮੌਤ ਹੋ ਗਈ। ਇਸ ਸਾਲ ਸੂਬੇ ਵਿੱਚ ਫ਼ੌਜੀ ਹੈਲੀਕਾਪਟਰਾਂ ਦਾ ਇਹ ਦੂਜਾ ਹਾਦਸਾ ਹੈ। ਯੂਐਸ ਆਰਮੀ ਅਲਾਸਕਾ ਦੇ ਬੁਲਾਰੇ ਜੌਨ ਪੇਨੇਲ ਨੇ ਕਿਹਾ ਕਿ ਹਰ ਹੈਲੀਕਾਪਟਰ ਵਿੱਚ ਦੋ ਲੋਕ ਸਵਾਰ ਸਨ। ਵਾਸ਼ਿੰਗਟਨ ਪੋਸਟ ਨੇ ਵੀਰਵਾਰ ਨੂੰ ਫ਼ੌਜੀ ਅਧਿਕਾਰੀਆਂ ਦੇ ਹਵਾਲੇ ਨਾਲ ਰਿਪੋਰਟ ਦਿੱਤੀ, ਇੱਕ ਸਿਖਲਾਈ ਮਿਸ਼ਨ ਤੋਂ ਵਾਪਸ ਪਰਤਦੇ ਸਮੇਂ ਕੇਂਦਰੀ ਅਲਾਸਕਾ ਵਿੱਚ ਦੋ ਅਪਾਚੇ ਹੈਲੀਕਾਪਟਰ ਕ੍ਰੈਸ਼ ਹੋਣ ਕਾਰਨ ਤਿੰਨ ਅਮਰੀਕੀ ਫੌਜ ਦੇ ਪਾਇਲਟਾਂ ਦੀ ਮੌਤ ਹੋ ਗਈ। 11ਵੀਂ ਏਅਰਬੋਰਨ ਡਿਵੀਜ਼ਨ ਨੇ ਫੇਸਬੁੱਕ 'ਤੇ ਕਿਹਾ ਕਿ ਫੋਰਟ ਵੇਨਰਾਈਟ ਤੋਂ ਇੱਕ ਏਐਚ-64 ਅਪਾਚੇ ਹੈਲੀਕਾਪਟਰ ਹੇਲੀ, ਅਲਾਸਕਾ ਦੇ ਨੇੜੇ ਕਰੈਸ਼ ਹੋ ਗਿਆ। ਫ਼ੌਜ ਦੀ ਇਕਾਈ ਨੇ ਹਾਦਸੇ ਦੇ ਕਾਰਨਾਂ ਦਾ ਵੇਰਵਾ ਦਿੱਤੇ ਬਿਨਾਂ ਕਿਹਾ ਕਿ ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਪਿਛਲੇ ਮਹੀਨੇ ਕੈਂਟਕੀ ਵਿੱਚ ਇੱਕ ਹੈਲੀਕਾਪਟਰ ਹਾਦਸੇ ਵਿੱਚ ਨੌਂ ਸੈਨਿਕ ਮਾਰੇ ਗਏ ਸਨ। ਯੂਐੱਸ ਆਰਮੀ ਅਲਾਸਕਾ ਦੇ ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਏਐਚ-64 ਅਪਾਚੇ ਹੈਲੀਕਾਪਟਰ ਫੇਅਰਬੈਂਕਸ ਦੇ ਨੇੜੇ ਸਥਿਤ ਫੋਰਟ ਵੇਨਰਾਈਟ ਤੋਂ ਸਨ। ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਅਲਾਸਕਾ ਸਟੇਟ ਟਰੂਪਰਜ਼ ਦੇ ਬੁਲਾਰੇ ਆਸਟਿਨ ਮੈਕਡੈਨੀਅਲ ਨੇ ਕਿਹਾ ਕਿ ਫਰਵਰੀ ਵਿਚ ਤਾਲਕਿਤਨਾ ਤੋਂ ਉਡਾਣ ਭਰਨ ਤੋਂ ਬਾਅਦ ਅਪਾਚੇ ਹੈਲੀਕਾਪਟਰ ਦੇ ਕਰੈਸ਼ ਹੋਣ ਕਾਰਨ ਦੋ ਸੈਨਿਕ ਜ਼ਖਮੀ ਹੋ ਗਏ ਸਨ। ਇਹ ਜਹਾਜ਼ ਫੋਰਟ ਵੇਨਰਾਈਟ ਤੋਂ ਐਂਕਰੇਜ ਦੇ ਜੁਆਇੰਟ ਬੇਸ ਐਲਮੇਨਡੋਰਫ-ਰਿਚਰਡਸਨ ਲਈ ਉਡਾਣ ਭਰਨ ਵਾਲੇ ਚਾਰਾਂ ਵਿੱਚੋਂ ਇੱਕ ਸੀ।
