ਨਵੀਂ ਦਿੱਲੀ, 21 ਸਤੰਬਰ, 2024 : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ ਵਿਚਾਲੇ 2014 'ਚ ਹੋਈ ਦਿਲਚਸਪ ਗੱਲਬਾਤ ਇਨ੍ਹੀਂ ਦਿਨੀਂ ਫਿਰ ਤੋਂ ਸੁਰਖੀਆਂ 'ਚ ਹੈ। ਇਹ ਘਟਨਾ ਪੀਐਮ ਮੋਦੀ ਦੇ ਅਮਰੀਕਾ ਦੌਰੇ ਦੌਰਾਨ ਵਾਪਰੀ, ਜਦੋਂ ਉਹ ਓਬਾਮਾ ਨਾਲ ਆਪਣੀ ਲਿਮੋਜ਼ਿਨ ਵਿੱਚ ਬੈਠੇ ਸਨ। ਇਸ ਦੌਰਾਨ ਮੋਦੀ ਨੇ ਆਪਣੀ ਮਾਂ ਦੇ ਘਰ ਦੇ ਆਕਾਰ ਦੀ ਤੁਲਨਾ ਓਬਾਮਾ ਦੀ ਕਾਰ ਨਾਲ ਕੀਤੀ ਅਤੇ ਕਿਹਾ ਕਿ ਰਾਸ਼ਟਰਪਤੀ ਓਬਾਮਾ, ਤੁਸੀਂ ਇਸ 'ਤੇ ਵਿਸ਼ਵਾਸ ਨਹੀਂ ਕਰੋਗੇ, ਪਰ ਤੁਹਾਡੀ ਕਾਰ ਮੇਰੀ ਮਾਂ ਦੇ ਘਰ ਦੇ ਆਕਾਰ ਦੇ ਬਰਾਬਰ ਹੈ। ਇਹ ਕਿੱਸਾ ਵਿਨੈ ਕਵਾਤਰਾ ਨੇ ਸਾਂਝਾ ਕੀਤਾ ਹੈ, ਜੋ ਉਸ ਸਮੇਂ ਵਿਦੇਸ਼ ਸਕੱਤਰ ਸਨ ਅਤੇ ਹੁਣ ਅਮਰੀਕਾ ਵਿੱਚ ਭਾਰਤ ਦੇ ਰਾਜਦੂਤ ਹਨ। ਇਹ ਘਟਨਾ ਉਦੋਂ ਵਾਪਰੀ ਜਦੋਂ ਦੋਵੇਂ ਆਗੂ ਰਸਮੀ ਗੱਲਬਾਤ ਤੋਂ ਬਾਅਦ ਮਾਰਟਿਨ ਲੂਥਰ ਕਿੰਗ ਜੂਨੀਅਰ ਮੈਮੋਰੀਅਲ ਦਾ ਦੌਰਾ ਕਰਨ ਜਾ ਰਹੇ ਸਨ। 10-12 ਮਿੰਟ ਦੇ ਸਫ਼ਰ ਦੌਰਾਨ ਦੋਵਾਂ ਆਗੂਆਂ ਵਿਚਾਲੇ ਪਰਿਵਾਰਕ ਗੱਲਬਾਤ ਸ਼ੁਰੂ ਹੋ ਗਈ। ਓਬਾਮਾ ਨੇ ਮੋਦੀ ਤੋਂ ਉਨ੍ਹਾਂ ਦੀ ਮਾਂ ਬਾਰੇ ਪੁੱਛਿਆ, ਜਿਸ ਦਾ ਮੋਦੀ ਨੇ ਇਹ ਮਜ਼ਾਕੀਆ ਜਵਾਬ ਦਿੱਤਾ। ਕਵਾਤਰਾ ਮੁਤਾਬਕ ਪੀਐਮ ਮੋਦੀ ਦਾ ਇਹ ਜਵਾਬ ਸੁਣ ਕੇ ਓਬਾਮਾ ਹੈਰਾਨ ਰਹਿ ਗਏ। ਕਵਾਤਰਾ, ਜੋ ਉਸ ਸਮੇਂ ਦੋਵਾਂ ਨੇਤਾਵਾਂ ਨਾਲ ਕਾਰ ਵਿਚ ਮੌਜੂਦ ਸਨ, ਨੇ ਕਿਹਾ ਕਿ ਇਸ ਗੱਲਬਾਤ ਨੇ ਦੋਵਾਂ ਨੇਤਾਵਾਂ ਵਿਚ ਡੂੰਘੇ ਰਿਸ਼ਤੇ ਦੀ ਸ਼ੁਰੂਆਤ ਕੀਤੀ। ਇਹ ਦੋਹਾਂ ਨੇਤਾਵਾਂ ਦੀ ਸਾਦਗੀ ਅਤੇ ਸੰਘਰਸ਼ ਨਾਲ ਭਰਪੂਰ ਉਨ੍ਹਾਂ ਦੇ ਜੀਵਨ ਦਾ ਪ੍ਰਤੀਕ ਸੀ ਕਿਉਂਕਿ ਦੋਵੇਂ ਹੀ ਸੰਘਰਸ਼ ਨੂੰ ਮਾਤ ਦੇ ਕੇ ਆਪੋ-ਆਪਣੇ ਦੇਸ਼ ਦੇ ਉੱਚੇ ਅਹੁਦਿਆਂ 'ਤੇ ਪਹੁੰਚੇ ਸਨ। ਪ੍ਰਧਾਨ ਮੰਤਰੀ ਬਣਨ ਤੋਂ ਬਾਅਦ ਮੋਦੀ ਦੀ ਇਹ ਪਹਿਲੀ ਅਮਰੀਕਾ ਯਾਤਰਾ ਸੀ। ਇਸ ਫੇਰੀ ਦੌਰਾਨ ਓਬਾਮਾ ਨੇ ਮੋਦੀ ਨੂੰ 1893 ਦੀ ‘ਪਾਰਲੀਮੈਂਟ ਆਫ ਵਰਲਡ ਰਿਲੀਜਨਸ’ ਬਾਰੇ ਇੱਕ ਦੁਰਲੱਭ ਕਿਤਾਬ ਭੇਟ ਕੀਤੀ। ਇਸ ਕਿਤਾਬ ਵਿੱਚ ਸਵਾਮੀ ਵਿਵੇਕਾਨੰਦ ਦਾ ਇੱਕ ਲੇਖ ਵੀ ਸ਼ਾਮਲ ਹੈ। ਪ੍ਰਧਾਨ ਮੰਤਰੀ ਮੋਦੀ ਦੀ ਦੁਨੀਆ ਭਰ ਦੇ ਨੇਤਾਵਾਂ ਨਾਲ ਜੁੜਨ ਅਤੇ ਉਨ੍ਹਾਂ ਨਾਲ ਮਜ਼ਬੂਤ ਰਿਸ਼ਤੇ ਬਣਾਉਣ ਦੀ ਕਾਬਲੀਅਤ ਚੰਗੀ ਤਰ੍ਹਾਂ ਜਾਣੀ ਜਾਂਦੀ ਹੈ।
