ਤਹਿਰਾਨ, 22 ਸਤੰਬਰ 2024 : ਲਿਬਨਾਨ 'ਚ ਈਰਾਨ ਸਮਰਥਿਤ ਹਿਜ਼ਬੁੱਲਾ 'ਤੇ ਇਜ਼ਰਾਇਲੀ ਹਮਲਿਆਂ ਦਰਮਿਆਨ ਈਰਾਨ 'ਚ ਵੱਡਾ ਹਾਦਸਾ ਵਾਪਰ ਗਿਆ ਹੈ। ਪੂਰਬੀ ਈਰਾਨ ਵਿੱਚ ਇੱਕ ਕੋਲੇ ਦੀ ਖਾਨ ਵਿੱਚ ਮੀਥੇਨ ਗੈਸ ਦੇ ਲੀਕ ਹੋਣ ਕਾਰਨ ਜ਼ਬਰਦਸਤ ਧਮਾਕਾ ਹੋਇਆ। ਇਸ ਹਾਦਸੇ 'ਚ ਹੁਣ ਤੱਕ 51 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ ਅਤੇ 20 ਲੋਕ ਜ਼ਖ਼ਮੀ ਹਨ। ਸਰਕਾਰੀ ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਹਾਦਸਾ ਈਰਾਨ ਦੀ ਰਾਜਧਾਨੀ ਤਹਿਰਾਨ ਤੋਂ ਕਰੀਬ 540 ਕਿਲੋਮੀਟਰ ਦੱਖਣ-ਪੂਰਬ 'ਚ ਸਥਿਤ ਤਾਬਾਸ 'ਚ ਵਾਪਰਿਆ। ਸ਼ਨੀਵਾਰ ਦੇਰ ਰਾਤ ਹੋਏ ਜ਼ਬਰਦਸਤ ਧਮਾਕੇ ਤੋਂ ਬਾਅਦ ਐਮਰਜੈਂਸੀ ਕਰਮਚਾਰੀਆਂ ਨੂੰ ਮੌਕੇ 'ਤੇ ਭੇਜਿਆ ਗਿਆ ਹੈ। ਧਮਾਕੇ ਦੇ ਸਮੇਂ ਉੱਥੇ ਕਰੀਬ 70 ਲੋਕ ਕੰਮ ਕਰ ਰਹੇ ਸਨ। ਸੂਬਾਈ ਗਵਰਨਰ ਮੁਹੰਮਦ ਜਾਵੇਦ ਕੇਨਾਤ ਨੇ ਸਰਕਾਰੀ ਟੀਵੀ ਨੂੰ ਦੱਸਿਆ ਕਿ 51 ਲੋਕ ਮਾਰੇ ਗਏ ਹਨ ਅਤੇ 20 ਜ਼ਖ਼ਮੀ ਹੋਏ ਹਨ। ਈਰਾਨ ਦੇ ਨਵੇਂ ਰਾਸ਼ਟਰਪਤੀ ਮਸੂਦ ਪੇਜੇਸ਼ਕੀਅਨ ਨੇ ਫਸੇ ਲੋਕਾਂ ਨੂੰ ਬਚਾਉਣ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਸਹਾਇਤਾ ਦੇਣ ਦੇ ਆਦੇਸ਼ ਦਿੱਤੇ ਹਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਤੇਲ ਉਤਪਾਦਕ ਈਰਾਨ ਵੀ ਕਈ ਤਰ੍ਹਾਂ ਦੇ ਖਣਿਜਾਂ ਨਾਲ ਭਰਪੂਰ ਹੈ। ਈਰਾਨ ਹਰ ਸਾਲ ਲਗਪਗ 3.5 ਮਿਲੀਅਨ ਟਨ ਕੋਲੇ ਦੀ ਖਪਤ ਕਰਦਾ ਹੈ ਪਰ ਉਹ ਹਰ ਸਾਲ ਆਪਣੀਆਂ ਖਾਨਾਂ ਤੋਂ ਸਿਰਫ 1.8 ਮਿਲੀਅਨ ਟਨ ਕੋਲਾ ਹੀ ਕੱਢ ਸਕਦਾ ਹੈ। ਬਾਕੀ ਕੋਲਾ ਦਰਾਮਦ ਕੀਤਾ ਜਾਂਦਾ ਹੈ। 2013 ਵਿੱਚ, ਈਰਾਨ ਵਿੱਚ ਦੋ ਵੱਖ-ਵੱਖ ਖਾਨ ਹਾਦਸਿਆਂ ਵਿੱਚ 11 ਮਜ਼ਦੂਰਾਂ ਦੀ ਜਾਨ ਚਲੀ ਗਈ ਸੀ। 2009 ਵਿੱਚ ਕਈ ਘਟਨਾਵਾਂ ਵਿੱਚ 20 ਕਰਮਚਾਰੀ ਮਾਰੇ ਗਏ ਸਨ। 2017 ਵਿੱਚ, 42 ਲੋਕ ਕੋਲੇ ਦੀ ਖਾਨ ਵਿੱਚ ਧਮਾਕੇ ਦਾ ਸ਼ਿਕਾਰ ਹੋਏ ਸਨ।
