ਪੁਣੇ, 27 ਸਤੰਬਰ 2024 : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਤਿੰਨ ਪਰਮ ਰੁਦਰ ਸੁਪਰਕੰਪਿਊਟਰਾਂ ਦੇ ਨਾਲ ਅਰਕਾ ਅਤੇ ਅਰੁਣਿਕਾ ਨਾਮ ਦੇ ਉੱਚ-ਪ੍ਰਦਰਸ਼ਨ ਵਾਲੇ ਕੰਪਿਊਟਿੰਗ ਸਿਸਟਮ ਲਾਂਚ ਕੀਤੇ। ਪੀਐਮ ਮੋਦੀ ਨੇ ਕਿਹਾ ਕਿ ਤਕਨਾਲੋਜੀ ਨੂੰ ਇਸ ਤਰੀਕੇ ਨਾਲ ਸੁਧਾਰਿਆ ਜਾਣਾ ਚਾਹੀਦਾ ਹੈ ਕਿ ਇਹ ਗਰੀਬਾਂ ਨੂੰ ਸ਼ਕਤੀ ਪ੍ਰਦਾਨ ਕਰੇ ਤੇ ਲੋਕਾਂ ਦੀ ਜ਼ਿੰਦਗੀ ਨੂੰ ਆਸਾਨ ਬਣਾਵੇ। ਉਨ੍ਹਾਂ ਕਿਹਾ ਕਿ ਵੱਡੀਆਂ ਪ੍ਰਾਪਤੀਆਂ ਹਾਸਲ ਕਰਨ ਲਈ ਵੱਡਾ ਨਜ਼ਰੀਆ ਹੋਣਾ ਜ਼ਰੂਰੀ ਹੈ। ਉਨ੍ਹਾਂ ਨੇ ਇਸ ਦਿਨ ਨੂੰ ਵਿਗਿਆਨ ਤੇ ਤਕਨਾਲੋਜੀ ਦੇ ਖੇਤਰ ਵਿਚ ‘ਵੱਡੀ ਪ੍ਰਾਪਤੀ’ ਦੱਸਿਆ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਨੇ ਇਹ ਨਿਸ਼ਚਿਤ ਕੀਤਾ ਹੈ ਕਿ ਆਮ ਆਦਮੀ ਨੂੰ ਟੈਕਨਾਲੋਜੀ ਵਿਚ ਖੋਜ ਦਾ ਲਾਭ ਮਿਲਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ, "ਵਿਗਿਆਨ ਵਿਚ ਆਤਮ-ਨਿਰਭਰਤਾ ਸਾਡਾ ਉਦੇਸ਼ ਹੈ। ਸਰਕਾਰ ਵਿਗਿਆਨ, ਤਕਨਾਲੋਜੀ ਤੇ ਖੋਜ ਨੂੰ ਤਰਜੀਹ ਦੇ ਰਹੀ ਹੈ। ਅਸੀਂ 2015 ਵਿਚ ਕੌਮੀ ਸੁਪਰਕੰਪਿਊਟਿੰਗ ਮਿਸ਼ਨ ਦੀ ਸ਼ੁਰੂਆਤ ਕੀਤੀ ਸੀ ਅਤੇ ਹੁਣ ਕੁਆਂਟਮ ਕੰਪਿਊਟਿੰਗ ਤਕਨਾਲੋਜੀ ਨੇ ਅਗਵਾਈ ਕੀਤੀ ਹੈ, ਜਿਸ ਸਦਕਾ ਸੂਚਨਾ ਤਕਨਾਲੋਜੀ ਵਿੱਚ ਮਦਦ ਮਿਲੇਗੀ। ਮੈਨੂਫੈਕਚਰਿੰਗ, ਐੱਮਐੱਸਐੱਮਈ ਤੇ ਇਹ ਸਟਾਰਟਅੱਪ ਦੀ ਬਿਹਤਰੀ ਵਿਚ ਮਦਦ ਕਰੇਗਾ। ਮਿਸ਼ਨ ਗਗਨਯਾਨ ਦੀਆਂ ਤਿਆਰੀਆਂ ਸ਼ੁਰੂ ਹੋ ਗਈਆਂ ਹਨ ਤੇ 2035 ਤੱਕ ਪੁਲਾੜ ਵਿਚ ਸਾਡਾ ਆਪਣਾ ਪੁਲਾੜ ਸਟੇਸ਼ਨ ਹੋਵੇਗਾ। ਭਾਰਤ ਆਪਣਾ ਸੈਮੀਕੰਡਕਟਰ ਈਕੋ ਸਿਸਟਮ ਬਣਾ ਰਿਹਾ ਹੈ ਜੋ ਗਲੋਬਲ ਸਪਲਾਈ ਚੇਨ ਦਾ ਮਹੱਤਵਪੂਰਨ ਹਿੱਸਾ ਹੋਵੇਗਾ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਸੁਪਰ ਕੰਪਿਊਟਰ ਇਹ ਨਿਸ਼ਚਿਤ ਕਰਨਗੇ ਕਿ ਸਭ ਤੋਂ ਛੋਟੇ ਕਿਸਾਨ ਦੀ ਦੁਨੀਆ ਦੇ ਸਹੀ ਗਿਆਨ ਤੱਕ ਆਸਾਨ ਪਹੁੰਚ ਹੋ ਸਕੇ ਤੇ ਫਸਲਾਂ ਬਾਰੇ ਸੂਚਿਤ ਫੈਸਲੇ ਲੈਣ ਵਿਚ ਉਹਨਾਂ ਦੀ ਮਦਦ ਹੋ ਸਕੇ। ਇਸ ਦੇ ਨਾਲ ਹੀ ਸਮੁੰਦਰੀ ਯਾਤਰਾ ਕਰਨ ਵਾਲੇ ਮਛੇਰਿਆਂ ਨੂੰ ਵੀ ਫਾਇਦਾ ਹੋਵੇਗਾ ਕਿਉਂਕਿ ਇਹ ਤਕਨੀਕਾਂ ਜੋਖਮਾਂ ਨੂੰ ਘੱਟ ਕਰਨਗੀਆਂ ਅਤੇ ਬੀਮਾ ਯੋਜਨਾਵਾਂ ਬਾਰੇ ਜਾਣਕਾਰੀ ਦੇਣਗੀਆਂ। ਏਆਈ ਤੇ ਮਸ਼ੀਨ ਲਰਨਿੰਗ ਨੂੰ ਸ਼ਾਮਲ ਕਰਨ ਵਾਲੇ ਮਾਡਲ ਬਣਾਉਣ ਦੇ ਯੋਗ ਹੋਣਗੇ, ਜਿਸ ਨਾਲ ਸਾਰੇ ਵਿਅਕਤੀਆਂ ਨੂੰ ਲਾਭ ਹੋਵੇਗਾ। ਪੁਣੇ ਦੇ ਜਾਇੰਟ ਮੀਟਰ ਰੇਡੀਓ ਟੈਲੀਸਕੋਪ ਦੀ ਵਰਤੋਂ ਸੁਪਰ ਕੰਪਿਊਟਰਾਂ ਦੀ ਵਰਤੋਂ ਕਰਦੇ ਹੋਏ ਖਗੋਲ ਵਿਗਿਆਨਕ ਘਟਨਾਵਾਂ ਦਾ ਅਧਿਐਨ ਕਰਨ ਲਈ ਕੀਤੀ ਜਾਵੇਗੀ। ਦਿੱਲੀ ਦਾ ਇੰਟਰ ਯੂਨੀਵਰਸਿਟੀ ਐਕਸਲੇਟਰ ਸੈਂਟਰ ਮੈਟੀਰੀਅਲ ਸਾਇੰਸ ਅਤੇ ਨਿਊਕਲੀਅਰ ਫਿਜ਼ਿਕਸ ਵਰਗੇ ਖੇਤਰਾਂ ਵਿਚ ਵਿਕਾਸ ਦਾ ਰਾਹ ਦਿਖਾਵੇਗਾ। ਪੀਐਮ ਨੇ ਦੱਸਿਆ ਕਿ ਅਰਕਾ ਅਤੇ ਅਰੁਣਿਕਾ ਦੋਵੇਂ ਨਾਂ ਸੂਰਜ ਨਾਲ ਸਬੰਧਤ ਹਨ। 850 ਕਰੋੜ ਰੁਪਏ ਦੇ ਉੱਚ-ਪ੍ਰਦਰਸ਼ਨ ਵਾਲੇ ਕੰਪਿਊਟਿੰਗ ਸਿਸਟਮ, ਜੋ ਕਿ ਮੌਸਮ ਤੇ ਜਲਵਾਯੂ ਖੋਜ ਲਈ ਤਿਆਰ ਕੀਤੇ ਗਏ ਹਨ, ਨੂੰ ਪੁਣੇ ਵਿਚ ਇੰਡੀਅਨ ਇੰਸਟੀਚਿਊਟ ਆਫ਼ ਟਰੌਪੀਕਲ ਮੈਟਰੋਲੋਜੀ ਅਤੇ ਨੋਇਡਾ ਵਿਚ ਮੱਧ ਰੇਂਜ ਦੇ ਮੌਸਮ ਦੀ ਭਵਿੱਖਬਾਣੀ ਲਈ ਨੈਸ਼ਨਲ ਸੈਂਟਰ ਵਿਚ ਸਥਾਪਤ ਕੀਤਾ ਗਿਆ ਹੈ। ਇਨ੍ਹਾਂ ਵਿਚ ਅਸਾਧਾਰਨ ਕੰਪਿਊਟਿੰਗ ਸ਼ਕਤੀ ਹੈ। ਇਹ ਪ੍ਰਣਾਲੀਆਂ ਥੋੜ੍ਹੇ ਸਮੇਂ ਵਿਚ ਚੱਕਰਵਾਤ, ਭਾਰੀ ਬਾਰਸ਼, ਤੂਫਾਨ, ਗੜੇਮਾਰੀ, ਗਰਮੀ ਦੀਆਂ ਲਹਿਰਾਂ, ਸੋਕੇ ਅਤੇ ਹੋਰ ਨਾਜ਼ੁਕ ਮੌਸਮੀ ਘਟਨਾਵਾਂ ਨਾਲ ਸਬੰਧਤ ਭਵਿੱਖਬਾਣੀਆਂ ਨੂੰ ਵਧੇਰੇ ਸਟੀਕ ਬਣਾ ਦੇਣਗੇ।
ਪਰਮ ਰੁਦਰ ਸੁਪਰ ਕੰਪਿਊਟਰ ਨਾਲ ਸਬੰਧਤ ਪੰਜ ਚੀਜ਼ਾਂ
- ਇਸ ਦੇ ਨਿਰਮਾਣ 'ਤੇ 130 ਕਰੋੜ ਰੁਪਏ ਦੀ ਲਾਗਤ ਆਈ ਹੈ।
- ਦਿੱਲੀ, ਪੁਣੇ ਅਤੇ ਕੋਲਕਾਤਾ ਵਿਚ ਸਥਾਪਤ
- ਭਾਰਤ ਵਿਚ ਪੂਰੀ ਪ੍ਰਣਾਲੀ ਵਿਕਸਤ ਹੋਈ
- ਐੱਮਐੱਲ ਅਤੇ ਡੀਐੱਲ ਫਰੇਮਵਰਕ 'ਤੇ ਏਆਈ ਸਮਰੱਥਾਵਾਂ
- ਕਲਾਉਡ ਸੇਵਾ ਦੇ ਤੌਰ 'ਤੇ ਕੰਪਿਊਟ/ਸਟੋਰੇਜ
ਕੀ ਹੋਵੇਗਾ ਫਾਇਦਾ
- ਏਆਈ ਤੇ ਮਸ਼ੀਨ ਲਰਨਿੰਗ ਸਮਰੱਥਾ ਸਦਕਾ ਆਮ ਲੋਕਾਂ ਨੂੰ ਤਕਨਾਲੋਜੀ ਅਤੇ ਗਤੀ ਦਾ ਫਾਇਦਾ ਹੋਵੇਗਾ।
- ਭੌਤਿਕ ਵਿਗਿਆਨ, ਧਰਤੀ ਵਿਗਿਆਨ ਤੇ ਬ੍ਰਹਿਮੰਡ ਵਿਗਿਆਨ ਵਿਚ ਉੱਨਤ ਖੋਜ ਵਿਚ ਮਦਦਗਾਰ ਹੋਵੇਗਾ
- ਦੇਸ਼ ਦੇ ਨੌਜਵਾਨ ਵਿਗਿਆਨੀਆਂ ਨੂੰ ਬਿਹਤਰੀਨ ਤਕਨੀਕ ਨਾਲ ਪ੍ਰਯੋਗ ਕਰਨ ਲਈ ਪਲੇਟਫਾਰਮ ਤਿਆਰ ਕਰੇਗਾ।
